Project Description

REDENAARS & DEBAT

REDENAAR- EN DEBATKOMPETISIES – nog ‘n faset in ons blou-kultuurdiamant

By die Afrikaanse Hoër Meisieskool LEEF, EET en DROOM ons Affie-leerders redenaars en debat – Afrikaans lê juis so  “volrond in ons monde” (met apologie aan Laurika Rauch).

REDENAARS

Die maksimum toegelate getal Affie-leerders neem aan vele redenaarskompetisies deel!

  • ATKV-REDENAARS: Nasionale Kompetisie
  • Dié kompetisie is sinoniem met die Afrikaanse Hoër Meisieskool se redenaars waar die klem op genotvolle, maar veral ook op kwaliteit-deelname geplaas word.
  • Affie-redenaars se junior en senior sprekers neem ewe volmondig aan die voorbereide sowel as onvoorbereide kategorieë deel.
  • Geleentheid word aan beide Huistaal- as Addisionele Taalsprekers (onder andere Sotho, Sepedi, Zulu) gegee, om te redeneer.

PRESTASIES: Huistaal – ‘n groot getal redenaars dring jaarliks na die halfeindrondte en selfs na die nasionale eindrondte deur.  In 2014 is Wini-Louise Myburgh (gr.12) vyfde en Zahn Rijnen (gr.9) tweede in die land.

Addisionele Taal – in hierdie kategorie het die Afrikaanse Hoër Meisieskool vanaf 2013 nog ‘n faset van die kultuurdiamant blink gepoets! Ons is baie trots op Itumeleng Maluleka (Kategorie: Voorbereid en Onvoorbereid – Landswenner in 2013 en 2014, Beste Senior Dogter in 2015, asook drie Beste Taalgebruiker-medaljes in dié tydperk), Gina Sibanda (Landsfinaal, tweede plek en ‘n Beste Taalgebruiker-medalje in 2015), Naledi Matebesi (Landswenner in 2015).

  • VAN HUYSSTEENS ORATORSFEES: Gauteng-Noord
  • Dié Oratorsfees is by uitstek daarop gemik om redenaars in onvoorbereide redenaartegnieke te skoei.
  • 10 spanne (4 redenaars elk) en 10 indiwiduele sprekers neem jaarliks aan die gewilde plaaslike kompetisie deel.

2016-PRESTASIES: Juliette Köhler (gr.11) en Elani Meyer (gr.12) is as top-drie presteerders aangewys.

  • RADIKALE REDENAARS: Nasionale Kompetisie
  • Ongeveer 50 leerders word jaarliks ingeskryf in die Kategorieë: Afrikaans, Engels Addisionele Taal (EAT) en Afrikaans Addisionele Taal (AAT).

2015-PRESTASIES: Itumeleng Maluleke (Nasionale Wenner, gr.8 – AAT), Zeané Nel (Toppresteerder, gr.8 – EAT), Graad 8-span (Nasionale tweede plek, Afrikaans Huistaal), Graad 9-span (Nasionaal derde plek, Afrikaans Huistaal), Itumeleng Maluleka (Nasionale Wenner, gr.10 – AAT), Gina Sibanda (Nasionaal tweede plek, gr.10 – AAT), Naledi Matebesi (Nasionaal eerste plek in 2014 en 2015) en drie dogters dring na Gauteng-Noord deur.

  • OPPIE TONG AF-REDENAARS

Dié kompetisie word vanjaar van stapel gestuur. Affie-redenaars sal beslis deelneem.

DEBAT

As ‘n leerder van die Afrikaanse Hoër Meisieskool van iets oortuig is, sal sy sommer “blou keppies” aan enige-iemand verkoop! Debat is ‘n belangrike kultuuraktiwiteit!                

1e spreker: Opponent, ek het mos aan jou bewys dat BLOU NIE NET ‘N KLEUR IS NIE!

2e spreker: Goed Opponent, jy het my oortuig – BLOU IS ‘N LEEFWYSE – ek sal

enige kleur vir die “Affie-blou” verruil!

 

  • ATKV-DEBAT: Nasionale Kompetisie

Volgens ATKV-statistiek is die Afrikaanse Hoër Meisieskool landwyd tussen 2005 en 2015 die suksesvolste debatskool in die junior afdeling met:

  • 3 eerste plekke, 4 tweede plekke en twee derde plekke.
  • Die Afrikaanse Hoër Meisieskool was in die tyd slegs drie keer nie op die podium nie.

2015-PRESTASIES: twee junior spanne dring na die landsfinaal deur. Liesel Horn, Leah Warmenhoven, Jolene Muller (gr.9) is tweede in die land. Liesel Horn verwerf die Beste Taalgebruiker-medalje.

  • AFRIKAANSE HOËR MEISIESKOOL vs C & N MEISIESKOOL ORANJE:

Sport-Kultuur-Uitruilnaweek

  • Die Afrikaanse Hoër Meisieskool is ‘n “tradisie”-skool. Een van die jaarlikse blou-blink-tradisies is die uitruilnaweek tussen die BLOU-SKOOL van Pretoria en die ORANJE-SKOOL van Bloemfontein!
  • ‘n Hoogtepunt van dié naweek se blink-blou aktiwiteite is die Vriendskaplike Onvoorbereide Debatkompetisie (3 senior en 3 junior debatteerders)! Oranje, Blanje, Blou is na só ‘n naweek nooit weer dieselfde nie – ORANJE word die NUWE BLOU en BLOU kry ‘n ORANJE SKYNSEL!