Project Description

REDENAARS & DEBAT

REDENAAR- EN DEBATKOMPETISIES – nog ‘n faset in ons blou-kultuurdiamant

By die Afrikaanse Hoër Meisieskool LEEF, EET en DROOM ons Affie-leerders redenaars en debat – Afrikaans lê juis so  “volrond in ons monde” (met apologie aan Laurika Rauch).

REDENAARS

Die maksimum toegelate getal Affie-leerders neem aan vele redenaarskompetisies deel!

ATKV-REDENAARS: Nasionale Kompetisie

  • Dié kompetisie is sinoniem met die Afrikaanse Hoër Meisieskool se redenaars waar die klem op genotvolle, maar veral ook op kwaliteit-deelname geplaas word.
  • Affie-redenaars se junior en senior sprekers neem ewe volmondig aan die voorbereide sowel as onvoorbereide kategorieë deel.
  • Geleentheid word aan beide Huistaal- as Addisionele Taalsprekers (onder andere Sotho, Sepedi, Zulu) gegee, om te redeneer.

VAN HUYSSTEENS ORATORSFEES: Gauteng-Noord

  • Dié Oratorsfees is by uitstek daarop gemik om redenaars in onvoorbereide redenaartegnieke te skoei.
  • 10 spanne (4 redenaars elk) en 10 indiwiduele sprekers neem jaarliks aan die gewilde plaaslike kompetisie deel.

DEBAT

As ‘n leerder van die Afrikaanse Hoër Meisieskool van iets oortuig is, sal sy sommer “blou keppies” aan enige-iemand verkoop! Debat is ‘n belangrike kultuuraktiwiteit!     

2018-PRESTASIES:

ATKV-REDENAARS: SEMIFINAAL

Op Vrydag 18 Mei 2018 neem 17 sprekers deel aan die semifinale rondte by Menlopark Hoërskool.

Drie van ons junior dogters eindig onder die top 5 voorbereide sprekers uit 25 deelnemers. Voorwaar ‘n puik prestasie! Geluk aan Amory Smith, Lindy Grobbelaar en Nikka Hood. NIKKA HOOD dring deur na die finaal nadat sy onder die top 3 sprekers eindig.

In die onvoorbereide-afdeling presteer KARLA FERREIRA briljant en sy dring deur na die finaal. Karla skop stof in die oȅ van 24 ander deelnemers.

Ons addisionele taal sprekers presteer ook briljant en ITU MALULEKE dring deur na die finaal uit 14 ander sprekers. Ons is baie trots hierdie sprekers wat baie hard voorberei het vir hierdie kompetisie wat die grootste redenaarskompetisie in die land is.

Vir die eerste keer in die skool se geskiedenis sal 3 sprekers AHMP in die finaal op 17 Aug by Buffelspoort verteenwoordig.

Dankie aan elke personeellid se insette en ‘n spesiale dank aan me Erica Dannhauser wat ook as organiseerder opgetree het.

 

          

AFRIKAANSE HOËR MEISIESKOOL vs C & N MEISIESKOOL ORANJE:

Sport-Kultuur-Uitruilnaweek

  • Die Afrikaanse Hoër Meisieskool is ‘n “tradisie”-skool. Een van die jaarlikse blou-blink-tradisies is die uitruilnaweek tussen die BLOU-SKOOL van Pretoria en die ORANJE-SKOOL van Bloemfontein!
  • ‘n Hoogtepunt van dié naweek se blink-blou aktiwiteite is die Vriendskaplike Onvoorbereide Debatkompetisie (3 senior en 3 junior debatteerders)! Oranje, Blanje, Blou is na só ‘n naweek nooit weer dieselfde nie – ORANJE word die NUWE BLOU en BLOU kry ‘n ORANJE SKYNSEL!