Koor & Sang
- Die senior koor, of “Blou Engele,” is die trots van ons skool. Hierdie dogterskoor word beskou as een van die top kore in Suid-Afrika. Die Blou Engele se klanke is dikwels te hoor oor die radio en op verskeie verhoë.
- Die koor sing ook gereeld saam met ander skool- en universiteitskore, want musiek is ʼn universele taal wat oor alle grense en kulture strek.
- Die Blou Engele neem jaarliks deel aan die Pretoria Eisteddfod sowel as die ATKV Applous-kompetisie.
- Die skool se Blou Engele het die afgelope vakansie in Sentraal-Europa getoer. Hulle het in Bratislava, Slowakye, opgetree en het by ‘n internasionale koorkompetisie (International Youth Festival) skoonskip gemaak.
Die Blou Engele het twee kategorieë gewen. Die koor het die volgende punte behaal: 96% vir Youth Choir Sopranos and Altos en 97% vir Musica Sacra with Accompaniment asook die GRAND PRIX-prys vir kore.
Kore kwalifiseer slegs vir die Grand Prix-prys as hulle ‘n punt van 97% en hoër behaal het. Ons dogters was uitmuntend. - AHMP se twee kore het vanjaar aan die Pretoria Eisteddfod deelgeneem. Die Junior Koor is met ‘n A++ aangewys as kategoriewenner Meisieskore: Onervare en is ook as algehele wenner van Onervare Kore aangewys. Wat ‘n puik prestasie. Die Blou Engele (Senior Koor) het in die Kategorie vir Meer Ervare Meisieskore deelgemeen. Hulle het pragtig gesing en is met A++ beloon. Die Blou Engele word ook as kategoriewenner aangewys.
Om deel te wees van ons Affie-koortradisie is voorwaar ‘n voorreg. Nuwe dogters wat in hul vorige skole se koor gesing het, asook gr 8’s en 9’s wat deel is van die junior koor, mag ‘n oudisie aflê om in die senior koor te sing. Gr 8’s en 9’s moet minstens een jaar in die junior koor sing voor hulle ʼn oudisie mag doen.
Dirigent: Mev Renette Bouwer
Organiseerder: Mev Marguerite Swanepoel marguerite.swanepoel@ahmp.co.za
Junior koor
Die junior koor bestaan uit graad 8- en 9-dogters. Voornemende gr 8’s kry in hul gr 7-jaar en weer aan die begin van hul gr 8 jaar die geleentheid om oudisies vir die junior koor te doen.
Dit is verpligtend vir graad 8- en 9- dogters om eers ‘n jaar in die junior koor te sing voordat hulle ʼn oudisie vir die senior koor kan aflê. Dogters wat aan die einde van graad 8 nie die oudisie vir die senior koor slaag nie, kan nog ‘n jaar in die junior koor sing en aan die einde van graad 9 weer ‘n oudisie aflê.
In 2022 wen ons junior koor die kategorie vir minder ervare kore by die Pretoria Eisteddfod.
Die junior koor het jaarliks ‘n oefenkamp, optredes binne en buite die skool, uitstappies na koorkonserte en die bywoning van optredes van die senior koor.
Dirigent: Mev Renette Bouwer
Organiseerder: Mej Lindie Brink lindie.brink@ahmp.co.za
AHMPlified
AHMPlified is ‘n a capella-groep wat aan saamsing nuwe betekenis gee. Die wêreld is wyer en meer waardevol wanneer ons kan saamsing met passie en goeie gees. In hierdie groep maak dit ons nie gespanne om te sing nie – ons sing om van ons spanning ontslae te raak.
Ná die aflê van ‘n oudisie word 20 dogters van gr 8 tot gr 12 gekies om deel te wees van hierdie ongelooflike a capella-familie. Ons sing enigiets van gewyde liedere, tot musiek uit die 60’s, tot Jacaranda FM se top 10-treffers. En soms skryf die groep ook hulle eie liedjies en verwerkings.
AHMPlified tree op by verskeie geleenthede en wil graag vir ons dogters die kans gee om hulle talente en passie te kan uitleef.
In 2018 en 2019 was AHMPlified die algehele wenners van die ATKV-Animato A capella-kompetisie.
Dirigent en organiseerder: Me. Steffie le Roux steffie.leroux@ahmp.co.za
Links: Matriek 2022-koorlede wat die koor aan die einde van die jaar verlaat het.
Kultuurnuus
Legato Koorfees
Die Blou Engele betower Europa
Affies-meisies pronk in die Poort-skryfkompetisie!
