Die Afrikaanse Hoër Meisieskool Pretoria is ‘n enkelgeslagskool vir dogters in die hartjie van die jakarandastad. Sowat 1 200 meisies stap elke dag deur die rooibaksteengange van dié eeu-oue skool, terwyl die koshuis vir 270 meisies van reg oor die land en so ver soos Namibië huisvesting bied.

By Affies glo ons dat jou vyf jaar op hoërskool jou in jou volle menswees vir die lewe voorberei. Hier gee ons om vir mekaar… Deur geloof, hoop, liefde en harde werk en met baie entoesiasme slaag ons daarin om ‘n veilige omgewing vir elke dogter te skep – ‘n omgewing waarin dogters kan waag, sodat hulle hul volle potensiaal kan bereik. Hier is plek vir elke dogter om te groei, te droom, haar ideale na te streef en haar talente te ontgin. Die dogters is dit eens dat dié skool jou karakter vorm en bou in die vyf jaar wat jy haar stoepe blink trap, sodat jy aan die einde van matriek hier uitstap as ‘n goed afgeronde, selfversekerde jong vrou wat ‘n verskil in haar gemeenskap gaan maak.