Sagtebal

Sagtebal word gedurende die derde kwartaal, van Julie tot Oktober, gespeel. Ons is trots om jaarliks twee spanne (A- en B-spanne) per ouderdomsgroep in die grootskoleliga in te skryf, en vanaf 2023 het ons ook C-spanne ingeskryf weens die groeiende belangstelling in die sport.

Affies neem jaarliks deel aan die Tshwane-provinsiale proewe, waar dogters gekies kan word vir provinsiale spanne en provinsiale kleure vir sagtebal kan verwerf. By die provinsiale toernooi kan dogters verder vereer word deur keuring tot die “All Star” span, wat die volgende jaar op toer gaan. AHMP spog tans met nie minder nie as 17 provinsiale spelers, sowel as 3 O/17-dogters wat in die Gauteng-span opgeneem is en wat aan die Somerspele sal deelneem, waar hulle die kans het om vir die SA-span gekies te word.

Ons bied dogters ook die geleentheid om aan verskeie kursusse deel te neem wat hulle oplei in tellinghou, afrigting en skeidsregting. ‘n Nuwe Affie-tradisie is om leerders na hierdie kursusse te stuur, sodat hulle die skool op die sportveld met ‘n vars perspektief kan dien en eer.

Die Geskiedenis van Sagtebal

Sagtebal is ‘n variant van bofbal, en het sy oorsprong in die laat 1800’s in Chicago, waar dit as ‘n kleiner weergawe van bofbal begin het. Die reëls, veldafmetings, en toerusting het dikwels gewissel, afhangend van die geslag en ouderdom van die spelers en die beskikbaarheid van toerusting.

In 1923 het sagtebal groot belangstelling gelok by mans en vroue van alle ouderdomme, wat gelei het tot die oprigting van ‘n komitee om vaste reëls en regulasies op te stel en te versprei. Vandaar het sagtebal oor die hele wêreld versprei. Vandag staan ons in verwondering oor die ontwikkeling van hierdie fantastiese sport wat ons as sagtebal ken.

Gryp jou handskoen en helm! Word deel van die opwinding en vind jou plek in die Affie-son.

Kontakpersoon:
Adri van Rooyen
adri.vanrooyen@ahmp.co.za