AHMP-orkeste
AHMP-Jeugorkes
AHMP se orkes onder leiding van mnr. Eddie Clayton is ‘n spogproduk van die skool se kultuur. Die orkes bestaan uit sowat 80 lede. Die orkes kry ruim geleentheid om by verskeie kunstefeeste, kompetisies, vertonings en geleenthede op te tree en só ondervinding op te doen.
Die orkes oefen jaarliks ʼn repertorium in wat gebalanseerd en uiteenlopend is – musiek wissel van klassiek, tot verwerkings van popmusiek. Die meeste van die musiek word deur Eddie Clayton self verwerk.
- Die diepte van AHMP se musiektalent blyk duidelik uit die feit dat dié orkes die afgelope paar jaar die grootste verteenwoordiging van skole in die Simfonia Juventi-jeugorkes het: nege dogters in 2023 en sewe in 2024.
- Die orkes lewer dikwels op uitnodiging ʼn etensuurkonsert in die Musaion by die Universiteit van Pretoria.
- In 2018 word die orkes genooi om deel te neem aan die Music in the Mountains-musiekfees. Ná hul optrede saam met die Drakensberg Seunskoor ontvang hulle ʼn staande toejuiging van die volgepakte saal.
- In 2016 en 2018 is die orkes deel van die skool se musiekblyspele Beauty and the Beast en Sneeuwitjie wat in die Staatsteater aangebied is.
- Van 2014 tot 2015 asook 2023 en 2024 word die orkes aangewys as beste jeugorkes en algehele beste orkes by die Pretoria Eisteddfod.
Dirigent: mnr. Eddie Clayton
Organiseerder: mev. Barbara Wiese barbara.wiese@ahmp.co.za
Ensemble-groepe
Die ensemble-groepe word meestal saamgestel uit dogters wat musiek neem van graad 8 tot 12. Die groepe wissel van jaar tot jaar soos die behoefte ontstaan en instrumente beskikbaar is. Buiten vir deelname aan kompetisies word die groepe dikwels genooi om items te lewer of agtergrondmusiek te verskaf by funksies. Lede van hierdie ensemble-groepe word gekies uit die beste musikante wat musiek neem en in die AHMP-orkes speel. Die groepe neem deel aan kompetisies soos die Pretoria Eisteddfod, die Nasionale Ensemble-kompetisie en die nasionale Symphonia-kompetisie in George.
- Simfonietta bestaan uit strykinstrumente (viole, altviole, tjellos en kontrabasse) onder leiding van mev Alna Smit.
- Die fluit-ensemble bestaan uit dwarsfluite, die piccolo, altfluit en basfluit onder leiding van mnr Pierre Tolsma.
- Die koperblaas-ensemble bestaan uit koperblasers (trompet, tromboon, Franse horing en tuba) onder leiding van mnr Jaco van Staden.
- ʼn Kitaar-ensemble word binnekort op die been gebring.
Kontakpersoon vir al die ensemble-groepe: Mev Alna Smit alna.smit@ahmp.co.za
Kultuurnuus
Legato Koorfees
Die Blou Engele betower Europa
