Tennis

Affies het vyf junior- en vyf senior spanne wat aan die Gauteng-skoleliga deelneem, sowel as heelwat spelers wat jaarliks in die Gauteng-Noord-skolekampioenskap speel. Spelers kan inval by verskillende oefengroepe, van die ontwikkelingsgroep wat spesiaal vir beginners is, tot die elitegroep.

AHMP neem ook jaarliks deel aan die volgende kompetisies: die Groot 5 Tennistoernooi (Nelspruit), Gerrie Berner (Paarl), Amanda Coetzer (Bloemfontein), Absolut Menlo (Pretoria), BVK Bethlehem (Bethlehem) en die Pat Uys Tennis Festival (Eunice, Bloemfontein). Daar is ook die opwindende jaarlikse interskole teen Oranje Meisieskool en Paarl Gimnasium, sowel as die Affie Gemengde Dubbelstoernooi, waartydens ons saam met ons boeties oorkant die pad speel.

‘n Hoogtepunt op die kalender is beslis ons eie Afgri O/15-Prestige Toernooi, waar van die sterkste tennisskole in die land deelneem.

Affie-tennis spog in 2024 met ‘n paar uitsonderlike prestasies:

• All Girls Festival – AHMP eindig 3de.

• Oranje Naweek – O.15’s wen, 1stes en 2des moes die knie buig.

• Paarl Gimnasium – Ons wen die jaarlikse derby.

• Amanda Coetzer – O.15’s wen die toernooi (eerste keer in geskiedenis), 1stes eindig 7de. Jessé de Villiers word as beste O.15-speler aangewys, en Daniella Loubser wen die beste sportmangeestrofee.

• Gauteng-Noord – Jessé de Villiers en Diane de Jager word in die 2024-span opgeneem. Vyf van ons spelers is gekies vir die 2025-span: Jessé de Villiers, Nelia Theron en Janique Beeslaar (O.15), en Diane de Jager en Janica Meyer (O.19).

• SA-kleure – Jessé de Villiers word opgeneem in die SA-span vir die ITF/CAT O.16 Zonal Kampioenskappe.